Act 22 | BEF | STEP | Lenali afo'nigi nogona'nigi nalalu'nigitase. Kaga'nimofihi hapa'a lu lepilunagi keheli'ehilo.

Acts 22

1 Lenali afo'nigi nogona'nigi nalalu'nigitase. Kaga'nimofihi hapa'a lu lepilunagi keheli'ehilo. 2 Polu ya luto ya'ma Yuta bona'mofihi nogoguti lu noepigo enali ka mone hiti melise mine'ahabe. To ai ma luto lu epi'ehina:

3 Nani Yuta bona'i nohube. Meya Silisia kapogu Tasasi hepatoga ito'nifu analo'i neketo'ehina. Yalo ma Yelusale hepatoga nele'mete ago sukulu tito to ya'ma babafi bo gi'a Gamelieli nelepito minago ya'ma tatatigihi mono'i keya ka'ani keheliya ito ya'ma hapa'agu keheli amuya huto hofa to'ohuna yabe. To lenali yatai hi'ahana suhi huto nani ana huto hulata minoto Hu'mamofitoga amuya moloto mino'ohuna. 4 Nani ya'ma Yesuhi kapogu mele'ahana'amagihi enegene mane huto enoho'ohube. Yana bona'mo hiti ana'mo hiti naga'i epito kalabusi nonugu enele'moto fitu fo'ohuna. 5 Ya'ma mamufa gilata bo, sipi bo to mono kanisole bona'i hiti enali asaga'i ya'ma hapa'ni koyapa ya huto ni'igo ma'naka nolibe keheli'ahabe. Enali fayahi keye'ahanana nimiloto noho lifilago buto Tamasiko hepato buto Yuta lalu'anifihi epiloto ana hepato Yesuhi kaga kehelise bona'i naga'i epito seni naga'i sa gi epoloto Yelusale hepatoga enele'moto oto osahi epilabe luto bu'ohuna yabe.

Polu komopa'a i gelehe hu'ehina ka lu epi'ehina

6 To yana kana'a kapo moloto nobuto Tamasiko hepatoga nehetilube'mu nohugo fuligaha'agu kokulumaluguti mone fanahuba nanitoga besa besa lo'ehina. 7 Ya nolago nani melugu limito nokago nogo'a moneuba lu nimi'ehina: Solio, Solio. Kai henabe luto nohoba nohoba nohane? luto ligo kehelito'ni: Kibina bo'nimaka kiyi'agabe? loka hago: Nani Nasalete bo, Yesu nohube. Noholatanamoya nohube, luto lu'ehina. 9 To enali nani hiti bu'ohuta bona'magi ya'ma fana besa lo'ehinana be gete to ka lu nimi'ehina nogo'amofihi mekeheli'ahabe. 10 To nani loka ho'ehina: Kibina bo'nio, nani hena hilube, lugo Sipi Bouba lu nimi'ehina: Ho tito Tamasiko nohi hepalugu tiletogo kaika hilatanamofihi Hu'mau kaga molo keto'ehina'a asaga'i lu hokolo hu ketalabe. 11 To nani ya'ma fana tose'auba nubugu figo bu pisi ligo nohugo nalalu'nifu enali nayahi lite nele'mete bago Tamasiko hepatoga neheti'ohune.

12 To bo mone mono'i mege'i malalata bomo, ai'a gi'a Ananiasi yabe ai kumu asaga Yuta bona'magi fokehi nelina bo ai anaga mino'ehina. 13 To ai oto nanitoga lebato ho tito minoloto lu'ehina: Solio, nalalu'niga kubu bati hino, ligo nani ana'asi bu go bati huto aimo bu go'ohuna. 14 To ai ma lu nimi'ehina: Hu'mau, tatatigihi kibinauba kaikamo kele'mo ho tibe. Kai ka'a kehelito mege'i malalane luto to ai'a hetofa agoya hu emi'ehina bo Yesuhi bu goloto to ai baga'aluguti nogo'a kehelilane luto kele'mo ho ti'ehina yabe. 15 To ya'ma bo kumu bu go'ahata hiti keheli'ahata hiti asaga'na kai tili tele huto buloto yege yege bona'i yanana lu epilane luto ai molo'ehibe. 16 To yatai hena'mu geba huto nominane? Ho tito buto Yesuhi gi'alo holoto foipanaka he'mito nagami'i folobo.

Polu ka lamana'a fegutoga bona'i lu yege hose'na'amofihi Hu'mau ka molo'ehina

17 To yalo nani Yelusale hepatoga aku'i oloto sipi mono nonugu tito nunumu huto bamu'i bu nogoto Yesu kaga lu nonimigo bu go'ohube. Nubu bu go saga hugo ma lu nimi'ehina: Kai me'me huto Yelusale hepatogati he'mito bufa hubo. Ya'ma hepato bona'i nani kumu kaga lu yege hose'na'a keheli he'milanagihe. 19 Ya luto ligo nani ma luto lu emi'ohube: Kibina Bo'nise, koyapa nani asaga fato fato mono nonugu tito agoya hu kimi'ahanamagihi enele'moto naga'i epito to segi osahi epito mino'ohuna ya'ma enali keheli bati hi'ahana. 20 To kai kumu kaga lu epise bo, Sitifeni efa kosatu afili'ahana halune'mu nehago nani yanaga minoto halana bomofihi kata'ani kaba huto to golahi limito filifa hu'ehina'a bati suhi nehabe luloto mino'ohuna ya'ma enali keheli'ahabe. 21 To ya lu emugo ai: Mana hepatogati he'mito bufa hubo. Nani fegutoga bona'iloga fato'i koho lifilube'mu nohube, luto Sipi Bo ya lu nimi'ehina yabe.

22 Polu ya luto beto hu epologo kehelite mine'ahabe. To ai ya'ma fegutoga bona'magi kumu ka noligo ana'asi enali nogo sipi melete ma li'ahana: Ana bomo ho filibo. Metoga mefilise minalina bati mehibe. Ho filibo. 23 To enali ya lite yafege gete sipi nogo melete enipakafa hite kata'ani li botala ite he'mite mumusopa getete ifo muya he'milago nebite nehago, 24 Lomu gimi bona'magihi kaba'aniuba bona'a lu epi'ehina: Poluhi ule'ale nonugu le'mete tilo. Segi osahi emilenogo ya'ma Yuta bona'magi ai kumu hekele lilata ho filibo litemofihi lu hokolo hu letalibe luto lu'ehina. 25 Ya luto lu epigo gimi bomagi le'mete bite nonugu tite sa gi etago Polu mone kaba bo yanugu ho ti'ehinamofihi loka ho'ehina: Nani Lomu bona'i nohunagi foipana'ni ni'ifi meni'ibe henabe ka foya meli'ahago osahi nimilatagihe? 26 Ya ligo ana kaba bouba ya'ma ka kehelito buto sipi kaba bo'a nohinalo lu emi'ehina: Ya'ma bo Lomu bo nohinagi kai hena hu etalube'mu nohane? ya ligo ana sipi kaba bouba Polu nohinaga buto ma loka ho'ehina: Kai lu nimibo. Kai Lomu bona'i nohapihe? O'yo luto Polu lu'ehina. 28 Ke, nani ya'ma sipi efapoloti he'mito Lomu bona'i lolo hu'ohuna'a mina fi'ohube luto ligo Polu ka'alo nona'a lu emi'ehina: Nani ya'ma Lomu bona'i nekete'ahana yabe. 29 Ya luto noligo osahi emilune'mu nehana bona'magi mele'isi aitogati he'mite topa he'ahana. To ya'ma sipi kaba bouba Poluhi seni nagatu sa gi'ehinagi to ai'a Lomu bo nohube lu'ehinagi yana'mu kehelito koli hu'ehibe.

Polu kanisole bo enubulo kaga Yuta bona'i lu hokolo hu epi'ehina

30 Ya'ma gimi bona'magihi kaba bouba Yuta bona'magi Polu kumu henana fisa i'ahanamofihi hapa'a kehelilube'mu nohuto eteka'a Poluhi seni naga'i gi'ahana'a li he'milo luto bona'a lu epigo li he'mi'ahana. Yalo'i ya'ma kaba bouba sipi mono noto kaba bona'i hiti to mono kanisole bona'i hiti li nupa hilete minalo luto kaga molo'ehina. Ya hago ai Poluhi le'moto buto enogobisalo ho tilube'mu he'mi eto'ehina.